وارلیغیمین واری بو داغلاردادی

آرخا: ستار گول محمدی قره داغلی بویوک شاعردن بیر گوزه ل شعر:
دئیین اسن یئللر چوخ تلسمه سین
وارلیغیمین واری بو داغلاردادی
قانیمدان سو ایچن حایات باغچامین
هر به هری، باری بو داغلاردادی

اوزومه باخمادی اوز گتیردیییم
یولوندا جان قویوب، جان بیتیردیییم
چتین قازاندیغیم، تئز ایتیردیییم
عشقیمین باهاری بو داغلاردادی

تالاندیم الینده کدرین، غمین
هر اؤتن ماهنینین توتمادیم دمین
اللری قوینوندا حسرت ننه مین
شیرین لایلالاری بو داغلاردادی

آرادیم آیاغین، آختاردیم باشین
تاپدیم قوجاغیندا هر عصرین یاشین
هر سؤکولون داغین، چاپیلان داشین
فرهاد تک معماری بو داغلاردای

هر بیر جیغیرینا سن باخسان درین
دویارسان کئچمیشین، آیاق ایزلرین
تاریخه چئوریلمیش هر ایگید، ارین
داش اولموش مزاری بو داغلارداری

هر قاریش تورپاغی گوللـه میش متین
دؤنموش بئشییینه شئعرین، صنعتین
عؤمورلوک سئوگی نین، ایلک محببتین
آچدیغی بازاری بو داغلاردادی

آشیق حوسئین، آشیق کریم قهرمان
شانلی دؤوران سوروب بوردا بیر زامان
نباتی آدلانان شاعیر خان چوبان
گزدییی گولزاری بو داغلاردادی

هر بیر جیغیریندان مین بیر یول آشیر
هر جیغیر بیر عصرین یوکونو داشیر
بیزسیزده بو داغلار ازلدن یاشیر
دونیانین باخاری بو داغلاردادی
دردلره درماندی دییه؛ آختارین
دوزلرده چیچه یین، زیروه ده قارین
ائلینه باغلانان شاعیر «ستّار»ین
اؤلمز آرزیلاری بو داغلاردادی

ـ عکس: سعید قاسمی