عاشیق ولی عبدی یه یازیلان مقاله

آرخا: عاشیق ولی عبدی یه یازیلان مقاله سخاوت عزتی دن. بو مقاله عاشیق ولی نین عزیزلمه سینده اوخوندی.
ابتدا بسم ا… دئییب گیررم بو مئیدانه من
اؤزوم دوغرو سؤزوم دوغرو سؤیلرم مردانه من
مرندلی محمد
اوریینده سؤز سینه سینده ساز ائل ائل ماحال ماحال – کند کند اوبا اوبا دولانان عاشیقلاریمیز همیشه بسم ا… دئییب یا حق چاغیریب شعر و هنر مئیدانینا گیریبلر :
بسم الله ائیله ییب گیررم مئیدانا
عاشیقلار استادی گؤروم هاندادی
قربانی
بؤیوک فضولی دئمیشکن :
ای فضولی انتهاسیز ذوق بولدون عشق دن
بؤیله دیر هر ایش که حق آدیله قیلسان ابتدا
اودور کی عاشیق اولان مجلس ده خیر اولار برکت اولار معرفت حقیقت دوزلوک صافلیق تمیزلیک غیرت شرف وجدان ادب و ارکان اولار
یالان شر بهتان غیبت اولماز
سؤزوموزه ثبوت کافی دیر عاشیق ادبیاتی شعرلرینین موضوعلارینا نظر سالاق :
حقیقت نامه، طریقت نامه، شریعت نامه، معرفت نامه، نصیحت نامه، فتوت نامه و یا جومرد نامه
ابتدا الف دن درسیم آلاندا
الست عالمینده دئمیشم بلی
حقیقت ده ایکی گؤزل سئومیشم
بیری محمدی او بیری علی
علی دن درس آلدیم ائیله دیم ازبر
گؤیلره ستوندو یئرلره لنگر
فاطمه ی زهرا شفای محشر
اونو سئچدیم گؤزللرین گؤزلی
عاشیق علسگر
عاشیق سؤزو باره ده چوخلو نظرلر دئییلیب و یازیلیب منجه بو آد عاشیقلارین تشیع مذهبی نه اولان عشق لریندن گلیر داها دوغروسو عاشیقلیق ایراندا شیعه لیگین رسمی لیگی ایله باشلانیر اوندان قاباق اوزان دئییلردی
ماراقلی بوراسی دیر کی ایران تورکلریندن علاوه تورکییه تورکمن تورکلرینینده عاشیق طرزینده شعر یازان شاعر و عاشیقلاری حضرت علی نین و وصف و مدحینده چوخلو شعرلر یازیبلار
اوزان مرحله سیندن عاشیق مرحله سینه گئچید ایندی ارسباران دئدیگیمیز قاراداغ ماحالیندا دیریلی کندیندن عاشیق قربانی ایله باشلانیر قوربانی دن بو یانا ساری عاشیق قاراداغلی خالد کلیبرلی علی گرگرلی محمد و بیر چوخ عاشیقلار یئتیریبدیر او آزمان استادلاردان بیری ده بو گون شرفینین حرمتینین صنعتینین ایشیغینا توپلاندیغیمیز اللی ایل ایگید اوغوللاریمیزین حیالی قیزلاریمیزین تویلاریندا تمیز اورکله خیر دوعا وئرن استاد عاشیق ولی دیر.
استاد ۱۳۲۳ اینجی ایل اهر شهرینین قدیم کندلریندن اولان آذغان کندینده مرحوم بهمن کیشی نین عایله سینده دونیایه گؤز آچیب قدیم نظام دا اولان آلتی اینجی صنفه قدر تحصیل آلیر
عاشیغین عایله سینده سس بیر الهی وئرگی سی اولوب بو وئرگی نسیل نسیل دوام تاپماقدادیر عاشیق ولی نین آتاسی مرحوم بهمن کیشی ده دیرلی سسی اولوب وعاشسغین قارداشلارینین داآنجاق نه علت باعث اولور ولی عاشیق اولسون :
اوشاقلیقدا آتاسیندان ائشیتدیگی بیر قاراداغ شکسته سی هاواسی بالاجا ولی نی سیلکه لیر و اونو عاشیق اولماغا مصمم ائدیر اودور عاشیق مکتبی بوراخیب بختینی بو صنعت ده گزیر مرحوم عاشیق جبرائیل دانش و علی بخشی کیمی استادلاردان بو صنعتی اؤیرنیر سونرا بیر مستقیل عاشیق اولاراق بسم دئییب مئیدانا قدم قویور
عاشیغین اؤزوندن سونرا گلن قاراداغ عاشیقلارینین بویونلاریندا استادلیق حققی واردیر
عاشیق ولی مختلف دولتی و انقلابی جشنلرده شرکت ائدیب گؤزل اجرالار انجام وئریبدیر
عاشیق ولی نی تکجه عاشیق موسیقی سینه سیغماق منجه عاشیغا بیر جفا اولار عاشیق ولی ماهر بیر موغام چی دیر ایستر فارس دستگاهلاریندا ایستر تورک دستگاهلاریندا
عاشیق ولی هانسی شعری اوخویوبسا ائله بیل او شعری عاشیق اؤزو یازیب یارادیب هر هانسی بیر آهنگی اوخویوب اوندا اؤزونه مخصوص بیرمهربند قویوبدور عاشیق ولی قاتاری عاشیق ولی چوبان یایلاغی قاراداغ شکسته سی قجریسی دشتی سی قهرمانی سی و دیگر موغاملار و عاشیق هاوالاری
واجیب دیر موسیقی استادلاری عاشیق ولی نین اوخودوقلاریندان نتلار یازالار گلن نسیللر اوچون یادگار و اؤیرنمه واسیطه سی اولا
عاشیغین بارز خصوصیتلریندن بیری ده گؤزو کؤنلو توخلوغودور بونو هرکس عاشیغی آزاراق تانییرسا تصدیق ائده جک عاشیق تویلارا پول اوچون گئتسه ده هئچ واخت پول اوچون اوخومادی عاشیق ولی او جمله عاشیقلارداندیر کی عاشیقلیق صنعتینه اینام و عشقی واردیر من اییرمی یئددی ایل مدتینده عاشیغی یاخیندان تانیدیغیما گؤره وار گوجومله دئیه بیلرم کی عاشیق ولی عاشیقلیق ووقارینی هر یئرده هر مجلیسده قورویوب ساخلادی آغا آغ دئدی قارایا قارا اونون مجلیسینده وارلی کاسیب ارباب آغا نوکر زورلو زورسوز بیلینمه دی او هامییا بیر انسان کیمی باخدی
عاشیقدان یوزلر ویدیو و آدیو کاستلری اللرده دیر بیر نمونه تاپیلمازکی عاشیق اوردا یونگول سقیل بیر سؤز اوخوسون او قربانی دن گونوموزه قدر عاشیقلارین شعرلرینی ازبر بیلیر و بوندان علاوه کلاسیک و معاصر شاعرلریمیزین شعر و یارادیجیلیغی ایله ده تانیش دیر بیر چوخ معاصر شاعرلریمیزین شعرلرینی ایلکجه اوخویان اولوب و بیزیم نسل ادبیاتچیلارین بوینوندا بؤیوک امگی واردیرشعرلریمیزی اوخوماقلا بیزلری تشویق ائتدی
اوزاق یوللار سروانیسان
یورولما عاشیق یورولما
بیر داها عزیز استاد عاشیق ولی یه اورک صمیمیتیله تشکرومو بیلدیریرم